"طاق طاق طاقية".. قصيدة للحرامية

"طاق طاق طاقية".. قصيدة للحرامية
06-04-2012 08:40 PM
طباعة


تعبيرية
جراسا نيوز -
خاص - 'طاق طاق طاقية..قصيدة للحرامية',مغناة شعبية كتب كلماتها علاء حياصات وهزاع التل , تلخص حالة الفساد في الاردن وتصف الفاسدين و اللصوص الذين نهبوا البلاد و افقروا العباد.

'طاق طاق طاقية..قصيدة للحرامية'
طاق طاق طاقية
وإحنا مَنّا حرامية
رن رن يا جرس
في عنّا خُرّافية
****
حكايتنا عن بلد صغير
لا فيو ميه ولا بير
وناسو كانوا بألف خير
لأول الألفية
****
طاق طاق طاقية
طاق طاق طاقية
****
وبليلة ما فيها ضو
حسّينا بهدير العو
ما لحقنا نقول اللو
بلعوا النعجة واللية
****
واحدهم عامل باشا
والثاني ما بيتماشا
والثالث كلا وحاشا
بل صاروا ألف وميه
****
طاق طاق طاقية
طاق طاق طاقية
****
من حرامي لحرامي
منين نجيب الحامي
بعت ثيابي وحرامي
وبقولوا صبر شوية
****
واسمعوا نصبر ع شو
عالفاسد على أبوه
هم بوكلوا شوكولامو
وإحنا بنطحن قُدسية
****
طاق طاق طاقية
طاق طاق طاقية
****
سرقونا وبقولوا ليش
يظل إلهم فوسفات وجيش
بيكفيهم يزرطوا عيش
هالحفرتلية
****
شكلهم نسيوا يا ناس
إنو إحنا ما بننداس
لو جعنا بنرفع الراس
وإلنا رب البرية
****
طاق طاق طاقية
طاق طاق طاقية
****
عبدالله ملكنا وبس
إسكوت وسماع وهُس
ما حدا بيقدر يندس
بينه وبين الرعية
****
عملوا البلد ديك وجاج
خبز فرنسي وكماج
وهاج هاج الفقر هاج
بس عليك وعليّ
****
طاق طاق طاقية
طاق طاق طاقية
****
شوف السيارات شوف
والفلل عليها روف
وابني بتمنى خروف
وبستنى العيدية
****
منين جاي من المطار
وين رايح عالمطار
وجدو كان يركب حمار
ويتعشى عالطبلية
****
طاق طاق طاقية
طاق طاق طاقية
****
منين جاب المصاري
مفكر ما حدا داري
بَيّعني وبَيّع جاري
بالبورصات العالمية
****
يا سعد احكي وما تخاف
كل واحد يحكي شو شاف
إحنا ما بنوكل أعلاف
إحنا شعب زقرتيه
****
طاق طاق طاقية
طاق طاق طاقية
****
هالقصة مالها نهاية
خبروا الرايح والجاية
ما بنهاب أولاد الداية
إحنا أولاد الحرية
****
لو ظايل منّا أعور
يا خاين ما تتصور
إنك عالبلد تقدر
إحنا إحنا اردنية
****
طاق طاق طاقية
طاق طاق طاقية
****
أردنّا إلنّا كلنا
بشرّبنا وبأكلنا
والفاسد يبعد عنّا
ما إله عنّا ديه
****
طاق طاق طاقية
طاق طاق طاقية
إحنا إحنا أردنية